Բանավոր հարցումը որպես ուսուցանող գնահատման միջոց

Ուսուցանող նպատակով բանավոր հարցումն օգնում է ուսուցչին բացահայտելու, թե աշակերտն ինչ գիտի և ինչ կարող է անել: Բանավոր հարցման դեպքում պետք է ուշադրություն դարձնել հետևյալ հանգամանքներին.

վերլուծել աշակերտի պատասխաններն ու հարցերը, որպեսզի բացա­հայտվի, թե ինչ գիտի աշակերտը, ինչպես է հասկանում և ինչ կարող է անել,

հարցերն օգտագործվեն` աշակերտների հատկանշական թերըմ­բռնում­ները պարզելու և հետագա ուսուցումը բարելավելու համար,

աշակերտի հարցերն օգտագործվեն նրա ըմբռնողունակությունը գնա­հատելու նպատակով:

Այդ նպատակներն իրագործելու համար շատ կարևոր է գտնել և օգտագործել առավել արդյունավետ հարցեր և նպատակին հասնելու ձևեր:

Կարելի է կազմել արդյունավետ հարցադրումների տեսակների աղյուսակ և օգտագործել: Օրինակ`

ինչպե՞ս կարող ենք վստահ լինել, որ …,

ի՞նչն է նույնը և ի՞նչն է տարբեր …,

մի՞շտ է ճիշտ/սխալ, որ …,

ինչպե՞ս կբացատրեք …,

ի՞նչն է սխալ …,

ինչո՞ւ է ճիշտ …, և այլն:

Բանավոր հարցման միջոցով կարելի է պարզել ուսուցանված թե­մայի կամ քննարկման ենթակա նյութի տիրապետման աստիճանը: Դա կա­րելի է անել առանձին աշակերտների հարցմամբ կամ դասարանին ուղղ­ված հարցով: Այդ միջոցներով պարզվում են սովորողների լեզվամտածողությունը, հաղորդակցվելու կարողությունը, տրամաբանությունը և արագ կողմնորոշ­վելու հատկությունը: Վիճակը ճշտելուց հետո ուսուցիչը պլանավորում է նկատ­ված թերությունները վերացնելու հետագա աշխատանքները: Բանավոր հարցումներն օգտակար են  հատկապես ուսումնական նոր նյութն աշա­կերտներին բացատրելուց հետո:

Աշակերտի ձեռքբերումների ճիշտ արժևորման համար կողմնորոշիչ հարցեր տալուց զատ, շատ կարևոր է աշակերտի պատասխաններն ուշա­դիր լսելը և դրանց մեկնաբանելն ու վերլուծելը: Երբեմն աշակերտի տված հարցերից կարելի է հետևություններ անել, թե որքանով է նա կարողացել հասկանալ ուսումնական նյութը, ինչն է բնորոշ նրա թերըմբռումներում: